اسلام آباد ۔ 3 اگست (اے پی پی) وزیراعظم محمد نواز شریف آکھیا جو اج دا پاکستان2013ء دے پاکستان توں کہیں ودھ پر امن ،خوشحال اتے مستحکم اے،پاکستان کوں دہشت گردی اتے انتہا پسندی دی چھاں توں کھڈ کراہیں استحکام اتے روشن خیالی دی فضاء اچ گھن امسوں،مقبوضہ کشمیر بھارت دا داخلہ معاملہ کائنی ،اقوام متحدہ دی قرارداداں اتے اہلِ کشمیر دی خواہشات دے مطابق مسئلہ کشمیر دا حل پاکستان دی خارجہ پالیسی دا بنیادی ستون اے،آپسی تنازعے دا پر امن اتے مذاکراتی حل ویلھے دی اہم لوڈھ اے،کہیں تصادم دے متحمل نی تھی سگدے،پاک چین دوستی کثیر الجہتی شراکت داری اچ بدل گئی اے،افغانستان اچ امن پاکستان دے امن سانگے ضروری اے۔اے گالھیں انہاں بدھ کوں ہم ملکاں اچ لگیے پاکستانی سفیراں دی ترائے ڈینھ واری کانفرنس دے چھیکڑی اجلاس نال خطاب کریندیں ہوئیں آکھی۔وزیر اعظم گزریل ڈو ڈینھاں اچ سفیراں دی کانفرنس اچ مرتب کیتی گئی سفارشاں دی روشنی اچ آپنڑے وژن کوں واضح کریندیں ہوئیں پاکستانی سفیراں کوں مخاطب کریندیں ہوئیں آکھیا جو اج دنیا دے سامنڑے پاکستان دا مقدمہ پیش کرنڑ سوکھا اے،تساں پورے اطمینان نال پاکستان دا تصور دنیا دے سامنڑے رکھ سگدے ہیوے اتے عالمی برادری کوں ایجھے مستقبل آلے پاسے متوجہ کر سگدو جئیں اچ معاشی خوشحالی وی اے اتے سرمایہ کاری دا تحفظ وی ۔وزیر اعظم آکھیا جو اگر کہیں ملک دی قومی شناخت ،علاقائی اتے عالمی شناخت نال ہم آہنگ کائنی تاں اونکوں بین الاقوامی سطح تے کلھا تھیونڑاں پئے سگدے ایں سانگے ساکوں اقدار دے نال عالمی تہذیبی اقدار دا وی خیال رکھنڑا ں اے اتے ایں نال آپنڑے فائدے کوں عالمی فائدے نال ہم جوڑنڑاں اے۔وزیر اعظم آکھیا جو اساں آپسی فائدے،ہک ڈوجھے دی خود مختاری اتے سالمیت دے احترام اتے عدم مداخلت تے یقین رکھیندے ہیسے ۔وزیرا عظم سفیراں کوں آکھیا جو اج پاکستان کوں ہکے ویلھے کئی محازاں تے سرگرم تھیونڑاں اے۔انہاں آکھیا اللہ دے فضل و کرم نال دہشت گردی مراکز دا خاتمہ کر ڈتا گئے ،ایں سانگے پاک فوج،پولیس،رینجرز ،سلامتی دے اداریاں اتے عوام جیڑھی قربانیاں ڈتن پوری دنیا انہاں دے معترف اے۔وزیر اعظم آکھیا جو چین اساڈا قابل بھروسہ دوست ملک اے،اے دوستی ہر دور اچ اتے ہر آزمائش اچ بئی پکی تھی اے۔اساں چینی حکومت اتے عوام دے تہہ دل نال مشکور ہیسے،اساں پاک چین دوستی کوں بئی بلندیاں تئیں گھن ونجنڑ سانگے پر عزم ہیسے،سی پیک دی حیثیت ہک گیم چینجر دی اے۔اے صرف معاشی منصوبہ نی،بلکہ ایندے نال اساں خطے اچ آپسی تعلقات دا ہک نواں وژن متعارف کرویندے پیسے۔انہاں سفیراں کوں مخاطب کر تے آکھیا جو اج تساں پاکستان دا تعارف دنیا دے سامنڑے رکھنڑاں اے،تسادی ذمہ واری اے جو تساں دنیا کوں اوں پاکستان نال متعارف کرائو جئیں دا شمار ابھردی ہوئی معیشتاں اچ تھیندا پئے جیڑھا جو ماضی دے مقابلے اچ کہیں ودھ مستحکم اے۔جتھاں انسانی حقوق دا احترام کیتا پاتا ویندے ۔انہاں امید کیتی جو سفیراں دی محنت نال پاکستان دا حقیقی تعارف دنیا دے سامنڑے امسی ۔انہاں آکھیا جو میکوں یقین اے جو تساں سفارت کاری کوں ہک مشن سمجھدے ہیسے اتے انشاء اللہ اساں ساریاں دی کوششاں نال دنیا روشن،محفوظ اتے مستحکم پاکستان نال متعارف تھیسی۔
اج دا پاکستان2013ء دے پاکستان توں کہیں ودھ پر امن ،خوشحال اتے مستحکم اے،وزیر اعظم محمد نواز شریف دا اہم ملکاں اچ لگیے پاکستانی سفیراں دی ترائے ڈینھ واری کانفرنس دے چھیکڑی اجلاس نال خطاب
مضمون کا ماخذ : قزاقوں کی کافی مقدار
متعلقہ مضامین
